قائمة متجددة : مستلزمات المولود

السلام عليكم جميعاً

البوست هذا راح يكون متجدد بإذن الله وتقدرون ترجعون له في كل وقت ،كأم جديدة احترت في قائمة المشتريات اللي تلزمني أنا وطفلي وماعرفت ايش الضروري وكيف أبدأ.

وكنت أقرأ كثير وأشوف فيديوات بس ماحسيت حاجتي تشبه حاجتهم، فقررت أطلع مع بنت عمتي بحكم خبرتها وقضينا الاغراض الضرورية.

كنت بالشهر السادس ووضعي الصحي يسمح لي، في بعض البنات يحاولون يخلصون أمورهم أبكر مني اذا كانت حالتهم ماتسمح او حسب الظروف.

سويت لنفسي لسته بالأغراض ورتبتهم على أساس ضروريات وكماليات باللي ناسبني، لما بديت أقضي ماكان عندي ميزانية محددة فأخذت أشياء ما احتجتها أو كان ممكن أستغني عنها.

الحين راح احط لكم الأشياء اللي اشتريتها سواء كانت اونلاين او من محلاتنا بالخبر.

يلا نبدأ بسم الله 

 

رضاعات كومو تومو

 اللي يميزها انها تشبه صدر الأم وتتخلص من الهوا فتقل الغازات من الطفل في منها حجمين مختلفين وتقدرين تغيرين مقاسات الحلمات كل ماكبر الطفل مثلا كبداية من ٠ الى ٣ / من ٣ الى ٦ / أكبر من ٦ أشهر / والأخير أكبر من ٦ أشهر للمشروبات الثقيلة. لما تشترينها تأكدي انك تاخذين اللي يناسب عمر طفلك . نفس هالماركة موجودة في ممزوورلد والسعر مختلف.

مخدة الرضاعة تلاقونها بأي مكان

جهاز التعقيم ينفع للرضاعات، اللهايات وأي شي يحتاج تعقيم.  

 

لهاية / مصاصة ، هالشي مو ضروري اذا ما تحتاجينه بس انا اخذتها للطوارئ أهم شي تكون معاها غطا،  وانتبهي للعمر المحدد عليها

قماش التجشؤ انا استخدمته لكل شي بصراحة مره مفيد واقتصادي يتوفر في ممزوورلد و ماماز اند باباز

رف تجفيف الرضاعات، ضروري جدا تلاقونه بسنتر بوينت

 فرشاة الرضاعات، أحسها تنفع اذا كانت الرضاعه قزاز وفتحتها صغيرة بس ما استخدمتها كثير لان رضاعاتي كانت كومو تومو

 

حوض استحمام، مهم  جدا، متوفر بممزوورلد وامازون

 

 

اسفنجة الاستحمام، مجموعة لقيتها في مذركير

منشفة بقبعة بكل مكان يبيع مستلزمات الأطفال

أدوات النظافة الشخصية، شامبو وغسول جسم وبودرة أطفال وعطر مخصص لهم خفيف ولوشن الجسم وفازلين ، حفاضات، مناديل مبللة ، كريم الحفاض ، أكياس /سلة الحفاضات المتسخة  وقماش تنظيف لثة الطفل

 

 

سلة الأغراض اليومية، أحبها جداااااا وفيه منها واجد أنواع ومن محلات مختلفة 

السرير ، حسب اللي يناسب كل أم، انا أخذت سرير مؤقت لعمر ٥ أشهر من تشيكو والثاني سرير أطفال من آيكيا

 

مخدة، فيه نوعين: العادية مقوسه من داخل تساعد راس البيبي انه ما يتسطح والثانية خاصة بالأطفال اللي عندهم ارتجاع وما يقدرون ينامون الا وراسهم مرفوع 

حماية لرأس من التسطح

للأطفال اللي عندهم ارتجاع

مهادات وأكياس النوم ، بالسوق أنواع كثيييييييرة خذو اللي يناسبكم منه ، انا حطيت صور الانواع الجديدة بس.

مفرش تغيير الحفاضة، فيه الاستخدام لمرة وحدة أو لعدة مرات راح تحتاجونه لما تكونون برا البيت سنتر بوينت عنده شي يشبه لهم.

العناية والاسعافات الأولية، مقص أظافر ، فرشاه شعر، مقياس حرارة ، قطن خاص لتنظيف اذن الطفل، شفاط الأنف لازم راسها لين تلاقونها بالنهدي انا اعتبرها المنقذ للآن استخدمها لدودي، مناديل تنظيف الألعاب وصابون تنظيف رضاعات وألعاب الطفل 

أثاث وأدوات، مثل العربة وكرسي السيارة وشنطة الطلعات 

وبكذا خلصنا لستة الأشياء الأولية المهمة وبحط لكم رابط للقائمة للطباعة هنا تحت. 

baby checklist

 

من الأشياء الإضافية اللي كانت مره مهمة وساعدتني كثير مع التوأم هي هذي اللي بحط لكم صوروها، بالاسم ابحثو عنها وبتلاقونها 

 

 

أي جديد للمواليد ماراح أبخل فيه ان شالله، وراح أجدد باستمرار مع اضافه الروابط مستقبلاَ.